Шурупсемпе саморезсем çинчен

Шуруп тата саморез — вĕсем иккĕшĕ те пăрапа çавăрса кĕртекен пăтасем, анчах вĕсен хушшинче пысăк уйрăмлăх пур. Шуруп вăл ĕлĕкренпех паллă крепёж, ăна яланах малтан шăтарнă шăтăка (е пластмасса дюбеле) вырнаҫтараҫҫӗ. Шурупăн резьби çивĕчех мар, ӑна яка та çемçерех металран тунă, çавăнпа хытă материалсене — бетона, кирпĕче е хулăм йывăçа — тӳрех пăрса кĕртме çук. Шурупсемпе чылай чухне йывăç ĕçĕсенче, сĕтел-пукан пуçтарнă чухне тата тĕрлĕ çирĕп мар çĕрте усă кураççĕ. Вĕсен пуçĕ те тĕрлĕрен пулать: çавра, тӳрĕ, пытарнӑ, çекĕл евĕрлĕ — кашни хăйне майлӑ ĕç валли.

Саморез вара — çĕнĕрех тапхăрти шухăшласа кăларнă япала, унăн ячĕ хăех «хăй пăрăнса кĕрекен» тенине пĕлтерет. Ăна малтан шăтăк тумасăрах тӳрех материала пăрса кĕртме пулать, мĕншĕн тесен унăн вĕçĕ питĕ çивĕч, резьби те хытă хурçăран тунă тата ӑна тарăнрах каснӑ. Саморезсем те тĕрлĕрен пулаççĕ: йывăç валли (сарлака утăмлă резьбапа), металл валли (вĕтĕ утăмлă резьбапа), гипсокартон валли, тăрă витме юрăхли (резинӑллӑ шайбӑпа) тата ыттисем те. Тĕсĕ тăрăх та уйăрма пулать: хура саморезсем ытларах пӳлĕмре усă курма, шурă е сарă (цинкпа витнӗскер) саморезсем нӳрĕк вырăнта, урамра ĕçлеме юрăхлă. Вĕсене пăрса кĕртме шуруповерт е электричество дрелӗ кирлĕ, отвёрткăпа усӑ курса алăпа çаврасси йывăр ĕç.

Хăш хатĕре хăçан суйламалла-ха? Енчен те эсĕ çирĕп конструкци тăвасшăн, вӑл пысăк йывӑрӑш чӑтмалла, унсӑр пуҫне хăçан та пулин салатса пуçтарма тивет пулсан — шуруп аванрах, мĕншĕн тесен вăл дюбельпе пĕрле вӑраха пыракан çирĕп çыхăну йӗркелет. Кĕске вăхăтра нумай ĕç тумалла пулсан, сăмахран, каркас хатӗрленӗ чухне е гипсокартон çыпӑҫтарнӑ чухне — саморезпа усӑ курмасӑр май çук, вĕсемпе ĕç виçĕ хут хăвăртрах пырать.

Тепĕр пĕлмелли япала: саморез çирĕп пулин те, ăна пĕр вырăнтан кăларса тепĕр хут çав шăтăках пăрса кĕртсен, вăл малтанхи пек тытма пăрахать — резьби материала «çисе» ярать. Çавăнпа ҫурт-йӗр ӑсталакан ӑстасем яланах икĕ тĕслĕ крепёжа та хăйсен аллинче тытаççĕ: пĕри — тĕплĕ ĕç валли, тепри — хăвăрт ĕç валли.